小雯雯 发表于 2017-8-7 23:32:13

2017-08-07被網民談論身型 Kellyjackie:觀眾只會用眼睛欣賞...



被網民談論身型 Kellyjackie:觀眾只會用眼睛欣賞歌手!
撰文:        史順宜 發佈日期:2017-08-07 22:20 最後更新日期:2017-08-07 22:20
每次的《流行經典50年》都會令大家憶起兒時,年輕時的回憶。不過昨晚的《流行經典50年》就找來了當年憑著《他約我去迪士尼》一曲成名的Kellyjackie為演唱嘉賓。節目出街後Kellyjackie再次成為網民焦點,有網民說她是一曲歌后,有人說她身型變肥唔認得,更有人說她紅歌唔紅人。其實「有頭髮邊個想做癩痢」,一首歌唱咗咁多年佢又會唔悶咩?而因為胃病做了手術導致她身型變肥你知唔知?Kellyjackie接受《香港01》訪問時也大嘆:「觀眾只會用眼睛欣賞歌手!」
Kellyjackie為節目《流行經典50年》擔任嘉賓,被網民取笑身型走樣。(網絡圖片)
Kellyjackie曾經都幾fit,可惜因為胃病令體重暴增。
Kellyjackie(陳曉琪)可以說是香港第一代的網絡歌手。在2004年憑著網上發佈的作品《他約我去迪士尼》一曲成名,當時更成為網上搜尋人氣榜第1位。隨著網上人氣Kellyjackie馬上便與當年的唱片公司簽約成為正式歌手,不過其後卻因與舊公司發生合約糾紛,所以令她的歌唱事業停滯不前,遇上人生的第一個低潮。

當Kellyjackie接受《香港01》訪問時談到過去低潮,她表示:「過咗去就由佢過去啦,只不過我覺得當時大家合作上有好多嘢需要時間去磨合得好啲,亦都要多謝佢哋(舊公司)曾經都有幫過我,曾經帶過我去唔同嘅地方工作,好多謝佢哋曾經出現過嘅。亦都因為當時有呢件事(合約糾紛)發生,所以我唔可以唱其他歌(舊公司的歌),而只可以唱《他約我去迪士尼》,變咗呢首歌陪伴我人生嘅低潮,加上我爺爺嫲嫲仲有公公相繼離開,所以我嗰幾年都好難過,又抑鬱所以暴瘦,所以我好收埋自己,唔會出去搵其他朋友,如果唔係有《他約我去迪士尼》我甚至唔會出去公開場合。」
Kellyjackie續說:「我好相信一句說話,塞翁失馬,焉知非福,當時好多人幫我,媽媽細佬好支持我,我亦好感恩,好多前輩好似米雪姐等,都好關心我同幫我,而且出手幫我介紹律師解決同舊公司嘅合約問題。而且我學識珍惜,當我未簽依家公司嘅時候,而仲有人搵我唱歌我真係覺得好感恩,因為佢哋搵我唔係因為我係咩大公司歌手,而係真係鍾意聽Kellyjackie唱歌。」

Kellyjackie又謂:「我覺得自己好另類,觀眾會識我首歌,但又未必認得我,又唔知我做緊乜,而我又未死仲喺呢行生存,我雖然得一首歌,但亦都因為咁,所以大家每年都總會諗起我一次,其實都幾好。」
每次聽到《他約我去迪士尼》都很有回憶。(網絡圖片)
《他約我去迪士尼》是Kellyjackie的成名作相信無人否認,但自她成名後,似乎暫時未有一首歌可以超越《他約我去迪士尼》的成績:「當初只係想寫首歌送畀我婆婆,所以有呢首《他約我去迪士尼》,全係由心而發,而入行之後寫嘅每一首歌,都喺以自己心聲出發而唔係要超越呢首歌,最緊要都係自己開心,我唔會因為受歡迎而隨波逐流。」

由曾經因為抑鬱而暴瘦,到最近在《流行經典50年》爆Mon亮相,Kellyjackie也明白自己身型會成為談論的話題:「我之前胃病,加上新陳代謝慢,所以以致身型變肥,我打算完成嚟緊嘅慈善舞台劇之後會去搵中醫調理一下,呢個都係我依家嘅一個小小嘅目標。我明白大家鍾意睇瘦瘦靚靚嘅歌手,但依家啲觀眾只會用眼睛欣賞歌手!身型上我會努力,但我希望大家都可以真係欣賞我嘅聲音!。」

最近忙於排練慈善舞台劇《誰來愛我》的Kellyjackie,問到她幾時有新歌,她表示:「8月尾我將會推出一首電影主題曲,係一首自己作曲填詞嘅作品,曲風會比較有型格啲,節奏感會重啲嘅一首歌,希望大家會鍾意。」

https://www.hk01.com/%E9%9F%B3%E6%A8%82/110211/%E8%A2%AB%E7%B6%B2%E6%B0%91%E8%AB%87%E8%AB%96%E8%BA%AB%E5%9E%8B-Kellyjackie-%E8%A7%80%E7%9C%BE%E5%8F%AA%E6%9C%83%E7%94%A8%E7%9C%BC%E7%9D%9B%E6%AC%A3%E8%B3%9E%E6%AD%8C%E6%89%8B-
页: [1]
查看完整版本: 2017-08-07被網民談論身型 Kellyjackie:觀眾只會用眼睛欣賞...